Mbi 5000 armë të ushtrisë, të zhdukura

Nga viti 1969 e deri në fund të vitit 2015 në Zvicër janë regjistruar si të zhdukura 5100 armë, pronësi e Forcave të Armatosura

Gjatë shtatë viteve të fundit, në Zvicër janë zhdukur më shumë se 500 armë ushtarake. Ndërsa nga viti 1969 e deri në fund të vitit 2015 janë regjistruar si të zhdukura 5100 armë, shkruan blick.ch.
Përgjithmonë të zhdukura kanë rezultuar 4800 sish, pasi që një pjesë e tyre janë gjetur ose janë kthyer.  Këtë e ka konfirmuar edhe një zëdhënës i Forcave të Armatosura të Zvicrës.
Sa u përket armëve të humbura në shtatë vitet e fundit, 400 konsiderohet se janë vjedhur. Pjesa që mbetet nga ky numër janë dhënë ose janë shitur pa pasur të drejtë që të shiten ose jepen. Një pjesë janë shkatërruar në raste shpërthimesh të zjarreve etj.
Nga të gjitha armët e paraqitura si të munguara, vetëm 39 i janë kthyer ndërkohë ushtrisë.
Vetëm gjatë vitit të kaluar janë zhdukur 82 armë të ushtrisë, nga të cilat sërish janë gjetur vetëm pesë.