Dell: Qeveri me “duar të pastra”

"Në qeverinë e ardhshme duhet të emërohen njerëz kredibilë, të cilët do të punonin me nder dhe të cilët i kanë "duart e pastra"

Pas deklaratave të shefit të Zyrës Civile Ndërkombëtare (ICO), Pieter Feith, njëherësh përfaqësues i posaçëm i BE-së në Kosovë, se pret që qeveria e ardhme të ketë ministra kredibilë, dhe që pjesë e saj të mos jenë zyrtarët që janë nën hetime, edhe ambasadori i SHBA-vë në Kosovë, Christopher Dell ka dal me deklarata të ngjashme.

Në një intervistë për Kohën Ditore, ambasadori Dell jep një sqarim të detajuar se cilët zyrtarë i kanë “duart e pastra”, e cilët duhet diskualifikuar nga qeverisja.

Sipas tij, të gjithë ata zyrtarë që janë dënuar ndonjë herë nga ndonjë gjykatë, që kanë ndonjë aktakuzë ose që kanë përjetuar ndonjë aksion të EULEX-it, si bastisje ose marrje në pyetje, nuk duhet të jenë pjesë e qeverisë së re.

“Situata e krijuar nga problemet zgjedhore mund të zgjidhet më parë nga një qeveri e mirë, se sa nga organizim i zgjedhjeve të reja”, ka thënë Dell në këtë intervistë, transmetoi KTV.

Ambasadori amerikan ka thënë se e di se të zgjedhurit në Kuvendin e ardhshëm do të kenë një pikëpyetje rreth legjitimitetit për shkak të mashtrimeve që kanë ndodhur në zgjedhje, por, sipas tij, në qeverinë e ardhshme duhet të emërohen njerëz kredibilë, të cilët do të punonin me nder dhe të cilët i kanë “duart e pastra”, në mënyrë që të kthehet besimi i qytetarëve në institucione dhe të hiqen dilemat rreth legjitimitetit të tyre.