Nazane Breca, ambasadore e Kosovës në Bernë të Zvicrës?

Ambasada e Kosovës në Bernë vazhdon të mbetet pa ambasador gati një vit pas dorëheqjes së Naim Malajt. Tashmë në Prishtinë po flitet se është propozuar si ambasadore e ardhshme ish-kandidatja e LDK-së për deputete, Nazane Breca.

Në Komisionin për Politikë të Jashtme të Kuvendit të Kosovës ka vazhduar intervistimi i kandidatëve për ambasadorë të rinj të Kosovës nëpër disa vende të botës.

Gjatë ditës janë intervistuar ambasadori i Kosovës në Tiranë, Ramiz Lladrovci, ai në Podgoricë, Skënder Durmishi, Qëndrim Gashi për ambasador në Francë dhe Lulzim Hiseni në Kanada.

Pas intervistimit pritet që presidentja në largim e vendit, Atifete Jahjaga, të bëjë dekretimin e tyre.

Po ashtu, priten edhe emërimet e Leon Malazogut ambasador në Japoni, Luljeta Vuniqit ambasadore në Hungari dhe Teuta Sahatçiut konsulle në New York.

Siç raporton KTV në Prishtinë, Qeveria e Kosovës, po ashtu, për ambasador në Bruksel ka propozuar ish-ministrin e Tregtisë dhe të Industrisë në qeverinë Thaçi 2, Bernard Nikaj, e ish-kandidaten e LDK-së për deputete, Nazane Breca, për në Ambasadën e Kosovës në Bernë të Zvicrës.

Kryetari i Komisionit për Punë të Jashtme, Enver Hoxhaj, ka folur për kriteret që duhet plotësuar kandidatët, duke thënë se ndër të tjera, kandidatët duhet të kenë potencial për ambasador dhe reputacion të lartë.