Së paku 52 të vrarë nga sulmi vetëvrasës në Pakistan

Foto ilustrim

Një sulmues vetëvrasës që ka ndodhur sot në një park në qytetin pakistanez, Lahore, ka lënë të vrarë së paku 52 persona.

Shpërthimi ka ndodhur pranë një këndi lojërash për fëmijë, në parkun Gulshan-e-Iqbal.

Zyrtarët kanë dhënë shifra të ndryshme për numrin e të vrarëve.

Mustansar Feroz, inspektor i policisë për zonën, ka thënë se së paku 38 veta janë vrarë dhe mbi 100 janë plagosur. Ndërkohë mediet kanë raportuar se numri i të vrarëve është ngritur në 52.

“Shumica e të vdekurve dhe të të plagosurve janë gra dhe fëmijë”, ka thënë ai. Po ashtu mediet theksojnë se shumica e të vrarëve janë të besimit të krishter,

Një zyrtar shëndetësor ka thënë për agjencinë AP se 44 persona janë vrarë.

Përgjegjësinë për sulmin nuk e ka marrë asnjë grup.

Lahore është kryeqytet i provincës Punxhab të Pakistanit, e cila është bastion politik i kryeministrit Nawaz Sharif.