Shoferët detyrohen të flasin gjermanisht, edhe gjatë pauzës!

"Kur ndonjëri në kthinën e duhanit flet në gjuhën e tij amtare, i tërhiqet vërejtja. Madje një kolegun tim e kanë kërcënuar edhe me pushim nga puna»

Muajin e kaluar qe bërë temë e madhe në opinionin zviceran vendimi i një komune që nxënësit, edhe gjatë pauzës në oborrin shkollor, të flisnin vetëm në gjuhën gjermane. Shumica e kritikonin këtë vendim. Tash së fundi edhe në një ambient tjetër, kësaj here në Aeroportin e Cyrihut, është vendosur që shoferët e autobusëve të flasin vetëm gjermanisht. Edhe gjatë pauzës për cigare, e edhe në telefonatat private!

Në të vërtetë, në një njoftim që figuron në ekranet e ndërmarrjes së autobusëve në arealin e aeroportit, mund të lexohet kjo përmbajtje: «Këmbimi ndërkulturor në autobus funksionon vetëm në rast se i gjithë ekipi e flet të njëjtën gjuhë», shkruan blick.ch.

Një tekst i tillë është në fakt një urdhëresë e shkruar në mënyrë më të sofistikuar, për të folur vetëm në gjuhën gjermane. Madje, përveç që në gjermanisht duhet komunikuar mes vete në pauzë, edhe telefonatat private duhen bërë në atë gjuhë, transmeton albinfo.ch. E dihet se një numër i madh, nëse jo shumica e shoferëve të autobusëve kanë gjuhë amtare të tjera dhe jo gjermanishten.

Portali zviceran më tutje ia jep fjalën një shoferi serb, Svetko F. (emër i shifruar) i cili ankohet për këtë urdhëresë, «Kur ndonjëri në kthinën e duhanit flet në gjuhën e tij amtare, i tërhiqet vërejtja. Madje një kolegun tim e kanë kërcënuar edhe me pushim nga puna», thotë ai, transmeton albinfo.ch. Ndërkohë, për të nuk është problem të flasë me kolegët e vet në gjermanishten e Zvicrës. Ai jeton prej 32 vitesh në Zvicër dhe e zotëron në mënyrë të përsosur këtë gjuhë. «Por kur më telefonon nëna ose motra, unë flas me to serbisht!».

Zëdhënësja e aeroportit ka thënë për portalin se: «është me rëndësi që të gjithë punëtorët të merren vesh mes vete në ekipet e tyre. Për këtë arsye, gjuhë komunikimi në ndërmarrje është gjermanishtja standarde. Kjo vlen edhe për mbledhjet e ekipeve. Por serbi Svetkon F. ngul këmbë: «Nuk lejoj të më ndalohet gjuha amtare».