Kosova do të pranohet më 3 maj në UEFA

Federata e Futbollit e Kosovës pritet që më 3 maj të pranohet në UEFA dhe FIFA.

Në Kosovë tashmë të gjithë janë të bindur se kjo do të ndodhë në Kongresin e përcaktuar më 3 maj në Budapest të Hungarisë. Kryetari i Federatës së Futbollit të Kosovës, Fadil Vokrri, duke folur për Radion Evropa e Lirë, vlerëson se sinjalet për një pranim të mundshëm të Kosovës në organizatën evropiane të futbollit janë mjaft pozitive.

“Në këtë kongres do të votohet dhe neve na duhet një shumicë e thjeshtë. Prej 54 votave na duhen 28 vota ‘për’. Shpresoj që ne do t’i bëjmë ato, sepse edhe në atë drejtim kemi punuar mjaft, pareshtur ndër vite e sidomos tash, në këto dy vjetët e fundit që kanë qenë edhe më intensive”, ka thënë Vokrri, përcjell albinfo.ch.

“Nëse kalojmë më 3 maj në UEFA, sigurisht që edhe më 13 maj do të kemi më pak probleme duke marrë parasysh që statuti i FIFA-s nuk e parasheh anëtarësimin në Kombet e Bashkuara dhe pengesa ligjore”, theksoi i pari i futbollit kosovar.