Reinhold Mitterlehner emërohet kancelar i përkohshëm në Austri

Reinhold Mitterlehner do të jetë kancelari i përkohshëm i Austrisë, pas dorëheqjes së një dite më parë të Werner Faymann-it.

Mitterlehner mban aktualisht postin e zëvendëskancelarit dhe vjen nga radhët e të djathtëve të Partisë Popullore, partnere në koalicion me Socialdemokratët.

Faymann dha dorëheqje pas humbjes së mbështetjes brenda radhëve të partisë së tij, për t’i hapur rrugë, siç tha, një qeverie që ka mbështetje të gjerë.

Mbështetja për të ra pas rezultatit të dobët në rundin e parë të presidencialeve të prillit, kur nga gara u eliminuan kandidatët e dy partive kryesore.

Në rundin e dytë të 22 majit garojnë Norbert Hofer nga ekstremi i djathtë, që është favorit për të fituar, dhe ekologjisti Aleksander van der Bellen.

albinfo.ch