Konferenca Islamike përcillet me protesta të qeta të kundërshtarëve

Kryetari i Këshillit Qendror Islam, Nicolas Blancho ka përshëndetur protestuesit e tubuar afër ndërtesës ku po mbahet konferenca

Në Biel/Bienne, po mbahet sot Konferenca vjetore islamike e organizuar nga „Këshilli Qendror Islamik”, një organizatë e njohur për qëdrimet e saj radikale, që drejtohet kryesisht nga zviceranë, besimtarë të konvertuar në islam nga besime tjera. Në konferencë marrin pjesë rreth njëmijë veta.

Ardhja e imamit kontrovers nga Prishtina, Shefqet Krasniqi, si edhe e disa personaliteteve tjera të kontestuara, nga vende të ndryshme të botës ka ngjallur zërat e protestës. Është fjala për disa organizata të krishtera dhe antiislamike që kanë shpallur mbajtjen e demonstratave në shenjë proteste.

Medie të ndryshme zvicerane patën njoftuar mbi mundësinë e ndalesës që shteti zviceran do t`i bënte imamit Krasniqi për të ardhur në Zvicër. Por, siç i ka konfirmuar ai dje portalit tonë, Krasniqi nuk ka pasur ndonjë pengesë për ardhjen këtu. Rrjedhimisht, ai është duke marrë pjesë në konferencën e Bielit.

Siç shkruan Bernerzeitung.ch, kryetari i Këshillit Qendror Islam, Nicolas Blancho ka takuar dhe përshëndetur protestuesit antiislamikë të tubuar afër ndërtesës ku po mbahet konferenca.

Gazeta shkruan më tutje se deri në pasditen e të shtunës nuk janë shënuar incidente në lidhje me këtë konferencë. Madje, ajo raporton se Blancho, në fjalimin e tij ka shprehur qëndrim vetëkritik në lidhje me trajtimin diskriminues që i bëhet femrës në shumë vende myslimane etj.

Këshilli Qendror Islam, në cilësinë e organizatorit do të bartë përgjegjësinë për sigurinë brenda shtëpisë së kongreseve ku mbahet konferenca. Ndërsa policia kantonale do të jetë e gatshme për të parandaluar sulmet e mundshme.