Fatmir Limaj nuk do të jetë pjesë e qeverisë së re

Nënkryetari i PDK-së, Fatmir Limaj, ministër në largim i Transportit dhe Post-Telekomunikacionit sot publikisht, pas fillimit të seancës konstituive të Kuvendit të Kosovës, bëri të ditur se nuk do të jetë pjesë e qeverisë së re.

“Kemi folur se do të jemi një qeveri e pastër, me kredibilitet moral, dhe unë jam njeriu më i përfolur në këtë vend. Nuk ndjehem fajtor. Por, para vetes kam obligim nga 75 mijë votues”, tha Limaj në një konferencë për shtyp.

Limaj dha se do të jetë i hapur për hetime lidhur me ministrinë që e drejtonte ai.

“Unë personalisht do të vazhdoj të qëndroj në Kuvendin e Kosovës dhe do të votoj qeverinë e Hashim Thaçit edhe nëse në të ka UDB-ashë”, ka thënë Limaj.

Ndryshe, mandatari për formimin e qeverisë  Hashim Thaçi, në momentin e fundit ka anuluar konferencën e paralajmëruar për orën 10:30, ku do të jepeshin emrat e PDK-së për përbërjen e qeverisë së re. Emrat e mundshëm të ministrave nga radhët e PDK-së janë përmendur nga gazeta Kosova Sot, e cila bazohet në burime brenda kësaj partie. Hajredin Kuçi – zëvendëskryeministër, Enver Hoxhaj – ministër i Punëve të Jashtme, Bedri Hamza – ministër i Financave, Besim Beqaj – ministër i Ekonomisë, Vlora Çitaku – ministre e Integrimeve, Bajram Rexhepi – ministër i Punëve të  Brendshme. Në anën tjetër, për postin e ministrit së Bujqësisë dhe të Ministrisë së Transporteve lakohen emrat e Blerand Stavilecit dhe Ramë Bujës

PDK-ja ka lidhur koalicion me AKR-në, e cila do të ketë postin e zëvendëskryeministrit, tre ministri – Ministrinë e FSK-së, Ministrinë e Tregtisë dhe Industrisë dhe Ministrinë e Shëndetësisë, si dhe pesë zëvendësministra. Lista “Dr. Ibrahim Rugova” do të ketë një zëvendëskryeministër dhe Ministrinë e Mjedisit dhe Planifikimit Hapësinor, si dhe dy zëvendësministra. SLS-ja do të ketë postin e zëvendëskryeministrit dhe tri ministri – Ministrinë e Pushtetit Lokal, Ministrinë e Kthimit dhe Ministrinë e Punës dhe Mirëqenies Sociale, si dhe tre zëvendësministra. Ndërsa gripi i pakicave joserbe do të drejtojë Ministrinë e Administratës Publike dhe pesë zëvendësministra.

Pas zyrtarizimit të koalicionin me të gjitha partitë që do të jenë pjesë e qeverisë dhe tashmë pritet vetëm votimi në Kuvend dhe përcaktimi i emrave për postet përkatëse.

Votimi për zgjedhjen e qeverisë kërkon 61 vota për. Mandatar për kryeministër është nominuar Hashim Thaçi. Partitë e koalicionit janë zotuar se kanë siguruar shumicën për zgjedhjen e presidentit dhe qeverisë. Në të kundërtën, dështimi eventual i zgjedhjes së tyre mund të qoj vendin në krizë të re institucionale.