Gjergjaj humb nga Haye me nokaut në raundin e dytë

Ajo që nuk ka ndodhur në 29 meçet e deritashme, i ka ndodhur sonte: Arnold Gjergjaj, boksieri ambicioz shqiptaro-zviceran i kategorisë së rëndë ka humbur në meçin e tij të 30-nga ish kampioni botëror, David Haye. Humbja ka ndodhur shumë shpejt, në raundin e dytë.

Me këtë është shuar njëherë për njëherë ëndrra e Arnold Gjergjajt për të arritur në majat e boksit profesionist botëror.

Të gjitha prognozat kishin paraparë fitoren e anglezit Haye, nisur edhe nga fakti se ai ka qenë kampion botëror dhe ka pasur përvojë më të pasur në nivelin më të lartë të boksit.

Meçi është zhvilluar në sallën e madhe të Londrës “Arena O2”, në praninë e rreth 20 mijë shikuesve.

Gjergjaj ka hyrë shumë i motivuar në këtë përballje, për të cilën ka stërvitur shumë gjatë disa muajve të fundit. Por si duket të gjitha këto nuk mjaftuan. Haye ka treguar epërsi të theksuar ndaj tij, gjë që rezultoi me fitoren e tij të shpejtë me nokaut ndaj boksierit shqiptar.