“Blick” frymëzohet nga Albinfo.ch

Albinfo.ch të martën ka publikuar një shkrim që ka ngjallur kurreshtjen e medieve zvicerane, para fillimit të Kampionatit Evropian në Francë. Ky shkrim është shkruar në kuadër të një bashkëpunimi gjatë tërë Evropianit “Franca 2016” me të përditshmen prestigjioze “Le Temps”.

Shkrimi i Albinfo.ch, i botuar në gjermanisht, në frengjisht dhe në shqip, e ka shtjelluar simbolikën që përmbajnë emrat e futbollistëve shqiptarë, të cilët luajnë për Përfaqësuesen e Zvicrës, por edhe të atyre lojtarëve që kanë shtetësi zvicerane dhe që luajnë për Shqipërinë.

Në këtë shkrim special është treguar për domethënien e emrave të lojtarëve shqiptarë në Kombëtaren e Zvicrës si të Valon Behramit, Xherdan Shaqirit, Granit Xhakës apo të atyre që kanë kaluar kah Zvicra dhe që luajnë për Kuqezinjtë si Arlind Ajetin, Amir Abrashin, Burim Kukelin e Shkëlzen Gashi.

Autorja e shkrimit, Vera Kika, veh në pah simbolikën, zanafillën si dhe jep detaje metaforike të emrave në fjalë, me qëlim që t`i mundësojë publikut zviceran të kuptojë më mirë se çfarë simbolizojnë emrat në fjalë.

Ndërkohë, ky shkrim, që është botuar po ashtu edhe në “Le Temps”, duket se ka motivuar edhe të përditshmen më të madhe zvicerane “Blick”, që të bëjë një shkrim të ngjashëm, ose më mirë thëne identik, duke treguar për kuptimin e emrave të futbollistëve shqiptarë.

“Shpresojmë që të shtunën ‘municioni’ (Xherdan Shaqiri) është i vërtetë, që ‘lulja’ (Blerim Xhemaili) të lulëzojë, flamuri zviceran të ‘valojë’ (Valon Behrami) dhe që Mehmedi të shkëlqejë”, shkruan “Blick”, ndërsa shkrim të njëjtë ka bërë edhe “Blick am Abend”, duke u inspiruar nga platforma albinfo.ch, që është zëri i shqiptarëve të diasporës në Zvicër.