Të ardhurat e larta të menaxherëve nuk do të taksohen

Sipas propozimit, për të ardhurat vjetore që kalojnë kufirin mbi 3 milionë franga duhej të vendosej një tatim plotësues

Parlamenti i Zvicrës, me një shumicë të ngushtë, ka vendosur sot kundër caktimit të një taksimi të ri të bonus-ëve në nivelin e pagave të menaxherëve. 97 deputetë kanë votuar kundër dhe 92 pro.

Me këtë vendim ai ka kundërshtuar propozimin e dhomës së kantoneve sipas të cilit, për të ardhurat vjetore që kalojnë kufirin mbi 3 milionë franga duhet të vendoset një tatim plotësues.

Pas këtij refuzimi, kundërpropozimi për “iniciativën kundër zhvatësve” të iniciuar tri vite më parë nga ndërmarrësi Thomas Minder i kthehet sërish komisionit përkatës të parlamentit.

Sikur edhe në debatet tjera, edhe kësaj here e djathta ishte kundër taksimit plotësues ndërkohë që e majta e konsideronte atë të drejtë. Përfaqësues nga SVP dhe FDP e konsiderojnë këtë si “plotësisht të papranueshëm” dhe dëmtues për ekonominë.

Ndërsa deputetë nga SP i kanë drejtuar kritika të djathtës për “zvarritjen me qëllim të shqyrtimit të iniciativës”, duke pasur frikë nga një referendum i mundshëm.