Gjermanët të dëshpëruar për humbjen

KEYSTONE

Trajneri i Gjermanisë, Joachim Low ka thënë se ekipi i tij nuk e meritoi të humbte nga Franca, megjithatë, i tillë është futbolli, shkruan albinfo.ch.

“Ky është futbolli dhe në një ndeshje ka gjëra që ndodhin. Franca arriti deri në fund me dy gola në avantazh dhe kur fiton 0:2 e meriton. Besoj se do të fitojë Evropianin, sepse Portugalia nuk ka bindur deri më tani. Ne ishim skuadra më e mirë sonte, por penalltia vendosi ndeshjen. Në fillim ishte një ndeshje e kontrolluar, më pas jo shumë. Në këto kushte disa raste mund të vendosin lojën. Po të kishim shënuar, do të dominonim ndeshjen. Një gol në minutën e 45 është një shok. Luajtëm me krenari dhe me meritë. Grizmann është një lojtar i madh”, u shpreh Low.

Duke folur për golin e dytë, ai evidentoi rolin e Shkodran Mustafit në gabimin e mbrojtjes gjermane. “Ishim tre kundër tre, luajtëm topin te Mustafi që duhet ta kishte larguar nga zona e rrezikut. Dominuam kryesisht në mesfushë, në atë situatë duhet të luanim. Neuer pothuajse e arriti topin, por më pas i ra pranë sulmuesit francez. Presioni në pjesën e dytë ishte i madh dhe ne patëm rastet tona”, theksoi trajneri i Gjermanisë.

Për sa i përket penalltisë, Low është përpjekur të evitojë polemikat. “Nuk duhet komentuar puna e gjyqtarëve. Nëse shihni se si Schweinstaiger mundohet të arrijë topin dhe se si i rrëshqet mbi dorë është vetëm mungesë fati. Nuk ka asgjë për të cilën të ankohesh. Ka një lëvizje të rrjedhshme kur kërcen dhe nuk mund ta kontrollosh”, ishin fjalët e tij duke justifikuar kapitenin.

I dëshpëruar pas ndeshjes ishte Manuel Neuer. “Nuk ka momente më të këqija se këto. Nuk dua të them se kemi qenë më të mirë, por 2:0 nuk është një rezultat i drejtë”, tha Neuer i dëshpëruar pas ndeshjes.