Gjendet i vdekur 28-vjeçari shqiptar në Angli, policia heton rastin si vrasje

Dy persona janë arrestuar nën dyshimin për vrasje, por janë liruar me kusht ndërsa hetimet vijojnë.

Një 28-vjeçar shqiptar është gjetur i vdekur në qytetin e Leicesterit, në Angli, ndërsa policia britanike po e heton rastin si vrasje, transmeton albinfo.ch.

Sipas Policisë së Leicestershire, autoritetet u njoftuan rreth orës 06:58 të mëngjesit të së dielës, pasi Shërbimi i Ambulancës së Midlands Lindore gjeti të riun, me inicialet E.L., në Compton Road.

Pavarësisht përpjekjeve, 28-vjeçari u shpall i vdekur në vendin e ngjarjes.

Lidhur me rastin, policia arrestoi dy burra, të moshës 36 dhe 27 vjeç, nën dyshimin për vrasje. Megjithatë, ata janë liruar me kusht, ndërsa hetimet për zbardhjen e plotë të rrethanave të ngjarjes vazhdojnë.

Policia ka krijuar një portal të posaçëm për grumbullimin e informacioneve dhe u ka bërë thirrje dëshmitarëve, si dhe personave që posedojnë pamje nga kamerat e sigurisë ose kamerat e automjeteve, t’i ndajnë ato me hetuesit.

“Hetimi ynë mbetet në vazhdim. Kemi një ekip të përkushtuar që po punon intensivisht për të përcaktuar rrethanat e plota të asaj që ka ndodhur. Po analizojmë pamjet e kamerave të sigurisë, provat mjeko-ligjore dhe po intervistojmë dëshmitarë. I bëj thirrje kujtdo që ka informacion dhe ende nuk ka folur me ne, të na kontaktojë sa më shpejt”, deklaroi inspektori detektiv Kevin Hames.

Autoritetet britanike nuk kanë bërë ende të ditur motivin e mundshëm të ngjarjes, ndërsa hetimet janë në zhvillim./Albinfo.ch

---