Serbët i prishin punët me EULEX-in

EULEX:Nuk do të ndikojë në punën e gjykatësve dhe policisë së BE-së që gjendet në këtë pjesë të vendit

Këshilltarët serbë të komunës paralele të Mitrovicës, me shumicë votash, mbrëmë kanë sjellë një vendim që ndërprerja e bashkëpunimi të zgjas derisa EULEX-i nuk fillon të sillet dhe punon në përputhje me mandatin që ka.

Po ashtu, me këtë vendim, pjesëtarëve të Policisë së Kosovës dhe pjesëtarëve të bashkësive joserbe iu është thënë të rishqyrtojnë veprimet e tyre dhe të përcaktohen se cilat interesa do t’i përfaqësojnë në të ardhmen.

Por, zyrtarë të EULEX-it kanë thënë se vendimi i serbëve të pjesës veriore të Mitrovicës për të ndërprerë bashkëpunimin me misionin e BE-së në Kosovë, nuk do të ndikojë në punën e gjykatësve dhe policisë së BE-së që gjendet në këtë pjesë të vendit.

Ndërkohë, sekretari shtetëror i të ashtuquajturës Ministri për Kosovën në qeverinë e Serbisë, Oliver Ivanoviq, i cili ka qëndruar dje në Mitrovicë, ka thënë se sot mund të sillet vendimi rreth shtyrjes për gjashtë muaj të regjistrimit në Kosovë, të paralajmëruar për 1 prill dhe se Serbia insiston që këtë regjistrim ta zbatojë Zyra për Shërbime Projektuese të Kombeve të Bashkuara (UNOPS).

Sipas tij, për shtyrje të regjistrimit ka klimë politike dhe se për UNOPS-in, nëse merr ndonjë detyrën për regjistrim të popullsisë në tërë territorin e Kosovës, do të ishte detyrë serioze.