Fëmijët shqiptarë në Zvicër, të tubuar nën hijen e flamurit kombëtar dhe atij të Kosovës, u prezantuan në mënyrë dinjitoze në turnirin tradicional “Mundialito 2016”. Ky turnir (i shtati me radhë) u organizua në stadiumin”Letzigrund” të qytetit të Zürichut dhe tuboi 45 ekipe apo 16 ekipe kombëtare, të fëmijëve të nacionaliteteve të ndryshme që jetojnë dhe punojnë në Zvicër. Morën pjesë 560 fëmijë – lojtarë si dhe u luajtën afro 300 ndeshje futbolli në gjashtë fusha. Ndeshjet ishin të ndara në katër grupe, ku fëmijët shqiptarë ishin prezent në të katër grupet, nën emrin e Shqipërisë dhe Kosovës. Pra gjithësej 8 ekipe, të cilat në mënyrë dinjitoze prezantuan jo vetëm kulturë sportive, por edhe identitet kulturor.

Dy ekipe “kombëtare”, që kishin mbledhur fëmijë nga të gjitha trojet shqiptare, nën një përkujdesje mirë të organizuar nga trajnerët Pajazit Sopi, Sali Gjikollaj, Sefer Abazi Avni Selimi, Bajramali Neziri, Enver Shaqiri, Ilir Morina, Bekim Ameti etj., u paraqitën me sukses, duke treguar jo vetëm shkathtësi sportive, por edhe një angazhim të veçantë në mbrojtjen e ngjyrave të kombëtareve Shqipëri dhe Kosovë. Këtë angazhim sportiv e zbukuroi edhe më tepër prezenca e prindërve, me flamuj kombëtar të dhe të veshur me ngjyra kuq e zi. Ata ishin përkujdesur që flamujt e Shqipërisë dhe të Kosovës të valonin sa më lart atë ditë në qytetin e Zürichut.

Qysh në hapjen e turnirit fëmijët shqiptarë u shfaqën bashkërisht Shqipëri – Kosovë, duke krijuar një pamje të mrekullueshme dhe duke u duartrokitur nga të gjithë. Kënga shqipe dhe flamuri shqiptar dhe ai i Kosovës kishin pushtuar anën kryesore të stadiumit. E gjithë kjo pamje, duke i shtruar edhe angazhimin e fëmijëve shqiptarë që të dalin sa më të suksesshëm, ku dy ekipe ishin edhe në finale, dëshmon se këta fëmijë kërkojnë përkujdesje më të madhe. Edhe atë jo vetëm nga ana e prindërit, por edhe përkujdesje institucionale, sepse flamuri shqiptar dhe ai i Kosovës mbrohen, ruhen dhe ngritën lart kudo ku ka shqiptarë. Dhe pikërisht kjo ditë ishte ditë në shërbim të Shqipërisë dhe Kosovës, falë fëmijëve shqiptarë dhe trajnerëve, të cilët me javë ishin angazhuar në përgatitjen e tyre.