Frika nga terrori armatos zviceranët

Gjatë vitit 2015 numri i kërkesave për t`u pajisur me leje të mbajtjes së armës ka qenë për 17 për qind më i madh se në vitin paraprak

Rastet e shtuara të sulmeve terroriste në gjithë botën dhe së fundi edhe në afërsi të Zvicrës, kanë shtyrë zviceranët të mendojnë më shumë për sigurinë e tyre. Përgjigja është: armatosja në rritje! Kështu, gjatë vitit 2015 numri i kërkesave për t`u pajisur me leje të mbajtjes së armës ka qenë për 17 për qind më i madh se në vitin paraprak.

Në të gjitha kantonet zvicerane, përveç në atë të Jura-s, sipas një hulumtimi të bërë nga gazeta “SonntagsBlick” ka pasur një rritje të kërkesave në fjalë. Rritja më e madhe për kokë banori është regjistruar në kantonin Aargau.

Gjendja në terren tregon se trendi i përmendur edhe gjatë këtij viti do të vazhdojë ose madje edhe do të shënojë rritje më të madhe, transmeton albinfo.ch. Kështu, në ato kantone ku edhe shifrat e vitit 2016 janë në dispozicion, dëshmohet për një shtim të kërkesave për armatosje.

Sipas qendrave policore, “Vrapimi” pas armatimit lidhet me pasigurinë që po përhapet te popullata si rezultat i rrezikut të shtuar nga terrori.