Për shkak të dështimeve në privatizim Kosova po detyrohet të paguaj dënime

Për arsye të dështimit të privatizimit të Telekomit të Kosovës edhe kompania “Z-Mobile” po kërkon nga Qeveria e Kosovës 44 milionë euro kompensim

Kompania gjermane “Axos Capital”ka deponuar një ankesë në një arbitrazh ndërkombëtar përmes së cilës po kërkon 50 milionë euro kompensim, për shkak të ndërprerjes së privatizimit të Telekomit të Kosovës, raporton gazeta “Zëri”. Më 4 qershor të vitit 2015 kompania “Axos Capital” e paditi Kosovën në Gjykatën Ndërkombëtare për Zgjidhjen e Mosmarrëveshjeve Investive (ICSID), për shkak të ndërprerjes së privatizimit të Postë Telekomit të Kosovës.

Kompania në fjalë kishte ofruar 277 milionë euro për blerjen e 75 për qind të aksioneve për privatizimin e Telekomit, por privatizimi u ndal për shkak se nuk e mori bekimin e Kuvendit të Kosovës. Tashti kjo kompani po kërkon nga Qeveria rreth 50 milionë euro dëmshpërblim.

Po për arsye të dështimit të privatizimit të Telekomit të Kosovës edhe kompania “Z-Mobile” po kërkon nga Qeveria e Kosovës 44 milionë euro kompensim.

Me dënime të tilla Kosova tashmë po mësohet. Vetëm pak javë më parë Gjykata Ndërkombëtare në Paris vendosi që Qeveria e Kosovës duhet t’ia paguajë shtypshkronjës austriake “AG Staatsdruckerei” 5 milionë euro për ndërprerje të kontratës për shtypje të pasaportave.