3100 refugjatë kanë humbur jetën në përpjekje për të hyrë në Evropë

Siç bën të ditur IOM (Organizata Ndërkombëtare për Migrim), numri i të vdekurve dhe i të zhdukurve në Mesdhe gjatë periudhës së deritashme të vitit ishte më i lartë se ai i vitit të kaluar

Deri tash gjatë këtij viti më shumë se 3100 refugjatë kanë humbur jetën në përpjekje për të kaluar në Evropë nga Afrika veriore nëpër Detin Mesdhe. Siç bën të ditur IOM (Organizata Ndërkombëtare për Migrim), numri i të vdekurve dhe i të zhdukurve në Mesdhe  gjatë periudhës së deritashme të vitit ishte më i lartë se ai i vitit të kaluar.

Në periudhën e njëjtë të vitit të kaluar ishin regjistruar 2754 të vdekur, shumica e të cilëve kanë gjetur vdekjen në përpjekjet e dëshpëruara për të kaluar Mesdheun nga Afrika e Veriut drejt brigjeve të Italisë.

Ndërkaq, po sipas IOM, nga 1 janari e deri më 7 gusht të këtij viti, në Evropë përmes Detit Mesdhe kanë ardhur rreth 260 mijë njerëz. Shumica prej tyre kanë zbarkuar në Greqi ose në Itali. Organizata Ndërkombëtare për Migracion vlerëson se në periudhën e njëjtë të një viti më parë kanë qenë disa dhjetëra mijë refugjatë më shumë që e kanë bërë këtë rrugë.