Kosovari fiton medaljen e artë për Kroacinë

Josip Glasnoviq është me prejardhje nga Janjeva në Kosovë, qytezë ku tash e qindra vjet jeton pakica kroate

Kroacia ka fituar medaljen e parë të artë në Lojërat Olimpike “Rio 2016” dhe atë falë një kosovar. Josip Glasnoviq është me prejardhje nga Janjeva në Kosovë, ku tash e qindra vjet jeton pakica kroate, shkruan albinfo.ch.

Glasnoviq ka fituar medaljen e arte në kategorinë e qitësve në cakun lëvizës, e njohur me termin “trap”. Në të njëjtën kategori Kroacia kishte fituar medaljen e artë edhe në Lojërat Olimpike në Londër para katër vitesh.

Mediat kroate, pothuajse të gjitha, kanë shkruar shumë për rëndësinë e medaljes së artë që për Kosovën e ka fituar Majlinda Kelmendi. Kanë lartësuar edhe aftësitë e saja sportive, edhe dashurinë që ka ajo për atdheun e saj për çka, siç shkruan për shembull ‘Jutarnjilist’, ka refuzuar edhe oferta shumë të majme për të garuar për ndonjë shtet tjetër, por ka pritur që medaljen ta fitoj për Kosovën e sajë.

Sikur për Majlindën mediat kroate tash shkruajnë edhe për heroin e ri të Kroacisë, Josip Glasnoviq. Edhe ai ka vuajtur shumë në jetë për të arritur këtë që ka bërë, dhe kjo falë po ashtu sakrificës së tij dhe të familjes së tij.

Kuriozitet është se ai është ende i papunë edhe pse në moshën 33 vjeçare. Pas medaljes së artë olimpike si dëshirën e tij më të madhe e ka shprehur që të gjej një punë, qoftë edhe si pastrues.

Në një reportazh të botuar nga e përditshmja Veçernjilist, gazetari i kësaj gazete në humor thotë se “sikur familja Glasnoviq të mos ishte larguar nga Kosova para sa vitesh Kosova tash do ti kishte dy medalje të arta”.