Trupat italiane, së shpejti braktisin Kosovën

Në Kosovë i kemi 600 njerëz, por ne po synojmë reduktimin në zero”, ka thënë ministri La Russa

Krahas reduktimit të pranisë së saj ushtarake në Afganistan dhe në Liban, Italia synon ta mbyllë praninë e saj në Kosovë, për shkak të shkurtimeve buxhetore.

Ministri i Mbrojtjes së Italisë, Ignazio La Russa citohet të ketë thënë “Ka disa kërkesa buxhetore, që na shtyjnë të reduktojmë praninë tonë në misionet ushtarake ndërkombëtare”, duke shtuar se Italia do të veprojë në harmoni me partnerët e jashtëm, ka shkruar radio “Europa e Lirë”.

“Në Kosovë i kemi 600 njerëz, por ne po synojmë reduktimin në zero”, ka thënë La Russa dhe ka shtuar se “ne duhet ta përshpejtojmë përfundimin e këtij misioni”.

Sipas të dhënave nga Ministria italiane e Mbrojtjes, në misionet e jashtme Italia i ka 7300 ushtarë.