Shumë shqiptarë në Serie A

Arlind Ajeti, Berat Gjimshiti, Etrit Berisha, Blerim Xhemaili, Përparim Hetemaj, Elseid Hysaj, Rey Manaj dhe Ledian Memushaj janë futbollistët shqiptarë që paraqiten në Serie A

Në fundjavë fillon njëra nga ligat më të forta në Evropë, ajo Serie A e Italisë, ku këtë sezon do të paraqiten shumë shqiptarë, shkruan albinfo.ch.

I pari që do të paraqitet në skenë është Arlind Ajeti, i cili këtë verë u transferua te skuadra e njohur italiane, Torino. Madje, Torino të dielën është mysafire e Milanit.

Atalanta luan me Lazion, por vështirë se do të shohim shqiptarë në fushë. Tek Atalanta luan mbrojtësi shqiptar, Berat Gjimshiti, kurse te Lazio, mbron Etrit Berisha, megjithatë, të dy pritet të jenë në bankën rezervë.

Bologna e pret Crotonen, ku bolonjezët janë favoritë, derisa së fundi në këtë skuadër u transferua mesfushori i Përfaqësueses zvicerane, Blerim Xhemaili. Ai u shpreh i lumtur për rikthimin në Serie A.

Chievo e Përparim Hetemajt e pret Interin, ku skuadra milaneze është favorite, megjithatë, Chievo shpesh herë ka ditur ta befasojë.

Derbi i shqiptarëve zhvillohet të dielën mbrëma, ku Napoli i Elseid Hysajt ndeshet me Pescarën, ku kapiten është Ledian Memushaj i Kombëtares shqiptare, ndërsa në sulm Rey Manaj. Ky i fundit është i huazuar nga Interi.