Ekspozitë pikturash për Nënën Terezë

Një ekspozitë me piktura të Nënës Terezë është hapur të premten në Katedralen që mban emrin e saj në Prishtinë, në kuadër të shënimit të Shenjtërimit të saj, që do të bëhet më 4 shtator në Vatikan. Rreth 20 punime nga dhjetë artistë lokalë do të jenë të ekspozuara për tri ditë me radhë në këtë Katedrale

Marian Nikolla, nga grupi ‘Infinity Art’, që merret me organizimin e ekspozitave të ndryshme, thotë se kjo është ekspozita e 6-të që organizohet në Prishtinë, me piktura të Nënës Terezë. Kësaj radhe, thotë ai, kjo ekspozitë po organizohet në kuadër të aktiviteteve për shënimin e ngjarjes së Shenjtërimit të Nënës Terezë. Të gjitha pikturat janë punuar posaçërisht për këtë ekspozitë, shkruan “Evropa e Lirë”.

 

“Janë punuar me një kualitet të lartë, artistët kanë pasur kohë rreth një muaj ditë për t’u përgatitur për këtë ekspozitë, pikërisht që këtë ditë ta kremtojmë me ngjyra dhe me dashuri të plotë për Nënën Terezë dhe për këtë kemi organizuar një ekspozitë kushtuar kësaj dite”, thotë Nikolla.

 

Marigona Toma, një artiste shqiptare që jeton në Zvicër, po prezanton në këtë ekspozitë 5 punime të saj, që kanë motiv Anjezë Gonxhe Bojaxhiun, të njohur në mbarë botën si Nëna Terezë.

 

“Si fëmijë e vogël nuk e di se çka më ka tërhequr më shumë që ta pikturoj Nënën Terezë. Ndoshta ajo mirësia e saj, videot e saj që i kam parë me plotë mëshirë…kjo më ka shtyrë gjithmonë që unë ta pikturoj Nënën Terezë…dhe këto janë ndër portretet që i preferoj më së shumti. Mund të them që deri më sot kam pikturuar mbi 30 piktura të Nënës Terezë”, thotë Marigona Toma, përcjell albinfo.ch.

 

Në ceremoninë e hapjes së kësaj ekspozite, Ipeshkvi i Kosovës, Dodë Gjergji, tha se Nëna Terezë duhet të jetë frymëzim për të gjithë, pasi ajo mundohej t’i mësonte njerëzit të jetojnë në paqe.

 

Në hapje të ekspozitës mori pjesë edhe Don Lush Gjergji, Vikar Gjeneral i Ipeshkvisë së Kosovës, i cili njihet si një ndër biografët më të shquar të Nënës Terezë. Ai flet për rëndësinë e shpalljes së Nënës Terezë shenjtore.

 

“Shenjtërimi është niveli më i lartë në Kishën Katolike, d.m.th, kur dikush është i dalluar në tri virtytet themelore: fe, shpresë dhe dashuri, dhe kur dikush e ka dhënë një kontribut të jashtëzakonshëm njeriut dhe njerëzimit, prandaj vihet si model i jetës, veprës dhe i frymëzimit”, shpjegon Don Lush Gjergji.

 

Më herët këtë vit Papa Françesku bëri të ditur se Nëna Terezë do të shpallet shenjtore më 4 shtator të këtij viti. Nëna Terezë, e cila u lind në vitin 1910 në Shkup, nga prindër shqiptarë, me emrin Anjezë Gonxhe Bojaxhiu, ishte murgeshë katolike dhe misionare, e cila pjesën më të madhe të jetës së saj e kaloi në Kalkutë të Indisë, ku themeloi urdhrin e saj të murgeshave të quajtur ‘Misionaret e Bamirësisë’. Fituesja e çmimit Nobel për P aqe ndërroi jetë në vitin 1997, në Kalkutë.

---