Gashi, në garë për ‘Debutuesin e Vitit’

28-vjeçari ka shënuar tetë gola dhe ka kontribuuar me katër asistime, shifra pozitive duke pasur parasysh faktin që Gashi nuk ka luajtur si sulmues i parë

Sulmuesi i Kombëtares shqiptare, Shkëlzen Gashi ka qenë një ndër futbollistët kryesor të Colorado Rapids, duke e ndihmuar skuadrën nga Denveri i SHBA-së të sigurojë pjesëmarrjen në “Play-off” katër javë para përfundimit të sezonit të rregullt, shkruan albinfo.ch.

Ai ka shkëlqyer në javët e fundit, derisa u zgjodh edhe futbollisti i muajit shtator në klubin e tij. Gashi tashmë është përzgjedhur mes pesë kandidatëve për çmimin “Debutuesi i vitit”, që vlerëson lojtarin më të mirë në sezonin e të parë në ligën amerikane të futbollit (MLS).

28-vjeçari ka shënuar tetë gola dhe ka kontribuuar me katër asistime, shifra pozitive duke pasur parasysh faktin që Gashi nuk ka luajtur si sulmues i parë si dhe ka qëndruar pa luajtur për disa javë si pasojë e një dëmtimi.

Ai vlerësohet nga mediat amerikane për nuhatjen para portës dhe gjuajtjet nga larg, ndërsa si pikë e dobët cilësohet pamundësia për të dhënë pasin e fundit brenda zonës.