Refugjatëve u ofrohen kurse përgatitore për të ndjekur studimet

Refugjatëve u jepet mundësia që në seminaret speciale të organizuara për ta, të dëshmojnë shkallën e njohurive në lëndët specifike

Për t`u mundësuar edhe refugjatëve të interesuar që të ndjekin studimet, gjithnjë më tepër shkolla të larta e universitete u mundësojnë atyre kurse speciale përgatitore. Kjo bëhet duke treguar mirëkuptim për refugjatët, të cilët të shumtën e rasteve i kanë humbur ose i kanë harruar dëshmitë e shkollimit të mbaruar në vendlindje në ikje e sipër, shkruan welt.de.

Për këtë arsye shumë universitete gjermane nuk e shikojnë tepër ngushtë punën e dokumenteve. Në këtë mënyrë refugjatëve u jepet mundësia që në seminaret speciale të organizuara për ta, të dëshmojnë shkallën e njohurive në lëndët specifike, përcjell albinfo.ch. Në disa nga republikat e Gjermanisë, refugjatët duhet t`i nënshtrohen provimeve pranuese ashtu sikurse edhe kolegët e tyre gjermanë.

Veç kësaj, ekziston edhe mundësia që refugjatët të fitojnë një vend studimi përmes kuotës për të huaj (5 deri 12 për qind të të gjithë studentëve). Landet e ndryshme kanë të drejtë që këtë kuotë edhe ta rrisin.

Megjithatë, ekspertët e arsimit tërheqin vërejtjen lidhur me këtë trajtim special pasi që sipas tyre nevojitet trajtim i barabartë për të gjithë ata që duan të studiojnë.