Shkëlqimi dhe rënia e Hykës te Luzerni

Mesfushori i Kombëtares shqiptare, Jahmir Hyka tashmë ka përfunduar në bankën rezervë dhe në tribuna, edhe pse në fillim ishte në formë të jashtëzakonshme

Jahmir Hyka ishte në formë të jashtëzakonshme këtë edicion, duke shënuar gola e duke bërë asistime, derisa u ftua edhe në Kombëtaren shqiptare pas disa vjetësh, shkruan albinfo.ch.

Megjithatë, kohët e fundit nuk ishte shumë në fushë, duke përfunduar në bankën rezervë edhe në tribuna.

Gazeta zvicerane “Luzerner Zeitung” ka intervistuar zëvendëstrajnerin e këtij klubi, Patrick Rahmen, i cili ka folur rreth këtij rasti.

“Gjatë periudhës së fundit, Jahmiri nuk ka luajtur ashtu siç e prisnim ne. Sidomos në fazën e kthimit mbrapa ka shfaqur mangësi. Gjithsesi, ne do të vazhdojmë të kemi nevojë për Jahmirin në të ardhmen”, theksoi zëvendëstrajneri, i bindur se pushimi do t’i bënte mirë mesfushorit shqiptar.

Hyka e nisi sezonin si titullar të Luzerna dhe shënoi tre gola në javët e para të kampionatit. Por, që pas grumbullimit të tij me kombëtaren për ndeshjet e shtatorit, ai nuk ka arritur të paraqitet në nivelet e kërkuara me klubin e tij dhe tashmë rrezikon seriozisht që të vazhdojë sezonin në stolin e rezervave.