Bajramaj: “Ëndërroja të bëhesha si Princesha Diana”

"Isha e fascinuar nga Princesha Diana dhe dëshiroja të isha sikur ajo", thotë Fatmire Bajramaj - Lira për "Zeit-Magazin"

Në vitet e para pas ardhjes në Gjermani, futbollistja e kombëtares gjermane me rrënjë nga Kosova Fatmire Bajramaj kishte dëshirë të bëhej si princesha Diana. Këtij “zbulimi” i kanë kushtuar hapësirë të madhe mediet gjermane, të cilat edhe ashtu ditëve të fundit shkruajnë në vazhdimësi për Fatmiren që me emër përgëdhelës e quajnë “Lira”.

“Në atë kohë ëndërroja që të bëhem këngëtare , vallzuese ose aktore e famshme, si yjet që i shihja në televizion. Ose, edhe më mirë, si një princeshë. Isha e fascinuar nga Princesha Diana dhe dëshiroja të isha sikur ajo”, thotë Lira për “Zeit-Magazin”.

Ndërsa sot Bajramaj ka një ëndërr tjetër. “Unë e parafytyroj veten që pas karrierës aktive të futbollit të jetoj me bashkëshortin dhe fëmijët e mi në Mönchengladbach, në afërsi të prindërve të mi. Natyrisht, unë mund të ëndërroja edhe për një jetë në Miami Beach në një vilë në plazh sikur P. Diddy. Por unë më me dëshirë ëndërroj për diçka që mund ta arrij realisht”, ka thënë veç tjerash Fatmire Bajramaj për “Zeit-Magazin”.

Mediet gjermane po ashtu shkruajnë për Fatmiren si vajzë e botës së “glamour”-it, e cila gëzon një popullaritet të madh në mesin e futbolldashësve gjermanë e më gjerë. Por, me gjithë simpatinë e pakontestueshme, ajo, siç e thonë mediet, nuk e ka të sigurt vendin e titullares në kombëtaren gjermane të futbollit.