Arrestime për terrorizëm në Kosovë e Shqipëri

Të arrestuarit ishin pjesë e një rrjeti të gjerë në Kosovë, Shqipëri dhe Maqedoni dhe ndihmonin në rekrutimin e të rinjve për t’iu bashkuar terroristëve të ISIS-it

Një aksion i madh policor është zhvilluar në Kosovë dhe Shqipëri, që ka përfunduar me arrestimin e disa personave në këto vende, shkruan albinfo.ch.

Policia e Kosovës bëri të ditur se janë arrestuar shtatë persona në rajone të ndryshme të Kosovës me dyshimin se kanë kryer vepra, siç thuhet, “të terrorizmit dhe kundër rendit kushtetues dhe sigurisë së Kosovës”.

Operacioni i nisur në mëngjes në rajone të ndryshme të Kosovës, është kryer nga drejtoria Kundër Terrorizmit në bashkëpunim me Prokurorinë Speciale të Kosovës dhe në mbështetje nga njësitë e tjera të specializuara të Policisë së Kosovës, thuhet në një kumtesë të Policisë.

Ndërkohë, katër persona, mes tyre edhe një mjek u arrestuan nga policia shqiptare nën akuzën e terrorizmit. Ka qenë një hetim disamujor, ku janë përfshirë jo vetëm policitë e rajonit, por edhe agjencitë ligjzbatuese evropiane që ka çuar në pranga katër shtetas në Shqipëri dhe disa të tjerë në Kosovë.

Të arrestuarit ishin pjesë e një rrjeti të gjerë në Kosovë, Shqipëri dhe Maqedoni dhe ndihmonin në rekrutimin e të rinjve për t’iu bashkuar terroristëve të ISIS-it.

Policia mendon se ka të tjerë të përfshirë, ndërkaq mban të shoqëruar më shumë se 16 persona, pesë shtetas të huaj dhe 11 shqiptarë. I gjithë ky grup mendohet se ka dijeni në lidhje me rekrutimet.

Operacioni rajonal anti-terror nisi në Kosovë dhe më pas vala e arrestimeve ndoqi të njëjtën linjë që përdorin edhe vetë terroristët për t’iu bashkuar ISIS-it. Policia tha se ka prova të mjaftueshme që katër të arrestuarit në vend, dy me banim në Shkodër dhe dy me banim në Dibër, merrnin financime nga biznesmenë për të bashkuar të rinjtë me ISIS. Ata ndihmonin gjatë udhëtimit të tyre deri në Siri luftëtarët që shkonin për t’iu bashkuar kësaj organizate.