Mërgata ndez qirinj për Astrit Deharin para Konsullatës Kosovare në Cyrih

Disa dhjetëra bashkatdhetarë nga regjioni i Cyrihut e më gjerë, aktivistë të subjekteve të ndryshme dhe familjarë të tyre kanë mbajtur një minutë heshtje dhe në pikëllim kanë nderuar kujtimin e idealistit të ndjerë

Para lokaleve të Konsullatës së Republikës së Kosovës në Cyrih është mbajtur pak më parë një homazh me ndezje qirinjsh në nderim të Astrit Deharit, aktivistit të Vetëvendosjes, i cili ka vdekur dy ditë më parë në rrethana enigmatike në burgun e Prizrenit.

Disa dhjetëra bashkatdhetarë nga regjioni i Cyrihut e më gjerë, aktivistë të subjekteve të ndryshme dhe familjarë të tyre kanë mbajtur një minutë heshtje dhe në pikëllim kanë nderuar kujtimin e idealistit të  ndjerë. albinfo.ch ka qenë në vendin e ngjarjes. Ata kanë ndezur qirinj dhe me ta në mënyrë simbolike kanë ndërtuar numrin 26, që shënon moshën e re, 26 vjeçare në të cilën u desh të shkojë Astriti nga kjo jetë.

Iniciativën për këtë aksion simbolik e ka marrë aktivisti i ri, Fatmir Bardh Haziri. Ai ka thënë se me këtë rast ka ndjerë obligim si shqiptar që të bëjë diçka për Astritin për t`i dhënë udhë dhembjes që e ka ndjerë ashtu sikurse dhe të gjithë të pranishmit. Haziri ka theksuar se nuk dëshiron që ky aksion simbolik të marrë orientim politik në favor të asnjë partie a lëvizjeje por të jetë vetëm një shprehje njerëzore e ndjenjave të dhembjes.

Në vazhdim fjalën e ka marrë Florim Kadriu, aktivist i mërgatës së këtushme dhe politikan i ri në skenën politike të Zvicrës. ai ka thënë veç tjerash se Kosova në të cilën është dashur të vdiste Astriti dhe , para tij edhe vëllai i tij, Arbnori, nuk është ajo Kosova për të cilën kanë ëndërruar ata që kanë dhënë gjithçka për çlirimin e saj. Prandaj, ka thënë ai, duhet një ekspertizë e pavarur për të na hequr dyshimet rreth vdekjes së Astritit.

Ngjashëm janë shprehur edhe oratorët tjerë si: Fatmir Brajshori, Isuf Sherifi, Shefket Hasani Osman Osmani dhe Agush Buja, të gjithë miq dhe bashkëpunëtorë të Avni Deharit, babait të Astritit. Ata kanë shprehur dhembjen për të riun shembullor dhe idealist i cili bashkë me prindërit e kishte lënë luksin e Zvicrës për të jetuar në Kosovën të cilën e mendonte të çliruar, raporton albinfo.ch. Por, vdekja e tij e pasqaruar ashtu si dhe e vëllait të tij, Arbnorit para dy vitesh vë shumë pikëpyetje para kësaj lirie, kanë thënë folësit.