Kosova nuk është pa gjasa kundër Turqisë

Milot Rashica dhe Samir Ujkani kanë thënë se do të japin maksimumin kundër Turqisë, në takimin që zhvillohet të shtunën në Antalia

Kosova finlanda

Përfaqësuesen e Kosovës e pret një ndeshje shumë e vështirë kundër Turqisë. Për këtë janë të vetëdijshëm edhe futbollistët kosovarë, megjithatë, ata thonë se do të japin maksimumin.

Milot Rashica, pret që Kosova të ketë përkrahje në ndeshjen ndaj Turqisë në kuadër të Grupit I kualifikues për ‘Rusia 2018’. “Gjithsesi pres një ndeshje të vështirë. Turqia është një kundërshtar i fortë. Ishte në Kampionatin Evropian. Luan para adhuruesve të vet, por besoj që edhe nga Kosova do të vijnë adhurues dhe shpresoj në një rezultat të mirë”, ka thënë Rashica.

Kapiteni i Kosovës, Samir Ujkani, ka deklaruar se ekipi është duke u komponuar mirë para ndeshjes me Turqinë. “Atmosfera është e mirë. Jemi një grup i ri interesant dhe kemi shumë talent dhe ngadalë po komponohemi dita ditës. Të jemi real sërish e kemi një ekip të fortë si Turqia, por ne duhet të kemi vetëbesim dhe të bëjmë lojë të mirë. Tash i dimë defektet tona dhe po përpiqemi që t’i mënjanojmë gabimet. Edhe Turqia është në krizë dhe ka ftuar lojtarë që më herët nuk ishin në përbërje. Do të ketë publikun e tij, por edhe ne do të bëjmë një lojë të fortë”, u shpreh Ujkani.