“Ilirët” me tingujt burimorë i dhanë frymë festive Ditës së Flamurit

Ky manifestim u organizua nga Shoqata Kulturore e Artistike “Ilirët” nga Lozana e udhëhequr nga Ilir Bytyqi

Në  sallën e “Aula de Bèthusy” të Llozanes, në pasditen e të dielës ishin mbledhur shumë bashkatdhetarë që kishin ardhur për të festuar 28 Nëntorin,  Ditën e Flamurit,  104 vjetorin e pavarësisë së Shqipërisë që  përkon edhe me ditëlindjen e Komandantit Adem Jashari dhe përvjetorin e daljes në skenë të Ushtrisë Çlirimtare të Kosovës.

Çiftelitë në duart e instrumentistëve tingëllonin si zëra bilbilash nën drejtimin e udhëheqësit artistik Ilir Bytyqi. Kënga dhe vallet burimore jehonin me mburrje  nga anëtarët a grupit ndërsa veshjet kombëtare dukeshin si një ylber ngjyrash në skenë. Binte në sy pastaj dueti Imsaleja dhe Adea, dy vogëlushet shumë të këndshme me një  zë bilbili që të mbeten gjatë në mendje.
Ky manifestim u organizua nga Shoqata Kulturore e Artistike “Ilirët” nga Lozana e udhëhequr nga Ilir Bytyqi. Bashkë me “Ilirët” ishin edhe mysafirët e këngës popullore Donika Ndreca, Gazmend Berisha , Flamur Sherifi, Amrush Morina e Flamur Shala.
Në këtë koncert nuk mungoi as kuzhina shqiptare.
Shoqata “Ilirët” mëse 22 vite nuk është ndalur së vepruari, në udhëtimin e saj për të ruajtur, kultivuar, prezantuar trashëgiminë tonë të pasur  kulturore si dhe në mbështetjen e shkëmbimeve ndërkulturore në Zvicër dhe jashtë saj.