Leku bëhet më i fortë në raport me euron

Rritja e fluksit nisi qysh një vit më parë, me hyrjen e 450 milionë eurove të marrë nga qeveria shqiptare në tregjet ndërkombëtare përmes emetimit të eurobondit

Ne tregun e këmbimit valutor në Shqipëri forcimi i lekut ndaj euros, por edhe valutave të tjera, ka marrë një hov të ri në muajin dhjetor. Sipas kursit zyrtar të këmbimit nga Banka e Shqipërisë, euro ka zbritur në nivelin e 134.4 lekëve, duke prekur vlerën më të ulët që nga shtatori i vitit 2009.

Sipas Agjencisë Telegrafike Shqiptare, dobësimi i euros ka qenë pak a shumë konstant gjatë këtij viti. Kjo ka reflektuar pjesërisht dobësimin e valutës evropiane në tregjet ndërkombëtare, por sidomos balancat e kërkesës dhe ofertës në tregun e brendshëm valutor.

Që nga fillimi i vitit është vërejtur një ofertë e shtuar dhe kërkesë e plogësht për euro.

Rritja e fluksit nisi qysh një vit më parë, me hyrjen e 450 milionë eurove të marrë nga qeveria shqiptare në tregjet ndërkombëtare përmes emetimit të eurobondit.

Burim i rëndësishëm valute kanë qenë edhe investimet konstante të huaja në disa projekte madhore apo edhe rritja e ndjeshme e të ardhurave nga eksporti i shërbimeve.