Mafia shqiptare e drogës, e zgjeruar edhe në Belgjikë

Droga e klasit A vjen në Antwerp nga Kolumbia, duke u fshehur në pllaka mermeri dhe trarë prej druri, të ngarkuar në kontejnerët e anijeve

Mafia shqiptare është e zgjeruar në Evropë, duke e kontrolluar edhe portin Antwerp në Belgjikë, shkruan e përditshmja “Mirror”, përcjell albinfo.ch.

Madje, e përditshmja britanike shkruan se Antwerp është kryeqyteti i kokainës në Evropë, kurse kontrollohet nga shqiptarët, të cilët e përdorin për të dërguar një nga lëndët narkotike më të shtrenjta drejt Londrës.

Droga e klasit A vjen në Antwerp nga Kolumbia, duke u fshehur në pllaka mermeri dhe trarë prej druri, të ngarkuar në kontejnerët e anijeve. Pastaj janë shqiptarët ata që e marrin në dorëzim me synimin e vetëm, ta çojnë drejt Londrës aty ku tregu është më i lartë.

Shifrat zyrtare tregojnë nivele rekorde të kokainës që është futur në Evropë, nga Belgjika. Në tetë muajit parë të 2016 është kapur 22 tonë kokainë, shumë herë më shumë se rekordi i vitit 2012 me 18 tonë.

“Mafia shqiptare mund të përfitojë nga situata për ta transportuar drejt Britanisë, ku fitimi është më i madh”, ka thënë një burim për britaniken “Mirror”.

“Ata e shesin kilogramin 50,000 euro në Britani, ndërsa në vende të tjera 30,000 euro”.