Gjermania i aplikon tarifat rrugore për veturat e huaja

Qeveria gjermane, në mbledhjen e së mërkurës, ka vendosur t’i aplikojë tarifat rrugore në autostradat gjermane, të cilat do të rrisin fondet për mirëmbajtjen e rrugëve rajonale dhe ndërkombëtare.

Vendimi i fundit i qeverisë në Berlin është bërë pasi Gjermania mposhti një mosmarrëveshje me Komisionin Evropian që ishte kërcënuar me padi kundër diskriminimit të automjeteve të huaja që do të duhet të paguajnë përdorimin e rrugëve nacionale, përcjell albinfo.ch lajmin e mediave gjermane.

Sipas propozimit të ri, tarifa më e lartë për automjetet e huaja, duke përfshirë automjete dhe vende të tjera të BE-së, do të jetë 130 euro dhe kjo do të varet nga niveli i emisioneve të automjeteve. Plani fillestar i qeverisë gjermane, e cila u pajtua me Brukselin, ishte që të gjithë shoferët duhet të paguajnë taksat në vlerë prej 165 eurosh në vit, por pronarët e makinave gjermane do të kompensohen në regjistrimin vjetor të automjeteve, që do të thotë se praktikisht në Gjermani do të paguajnë vetëm shoferët e huaj.