Abrashit nuk i kryen punë pasaporta diplomatike, e përdor atë zvicerane

“Më ndodh gjithmonë që duan të shohin një tjetër dokument, sa herë që paraqes pasaportën diplomatike të Shqipërisë. Në çdo moment, u tregoj pasaportën zvicerane për të shmangur çdo pengesë”, deklaroi Abrashi

Kualifikimi i Shqipërisë në Kampionatin Evropian ishte historik. Futbollistët kuqezi u nderuan ku shkuan, derisa Qeveria Shqiptare i shpërbleu me pasaportë diplomatike, shkruan albinfo.ch.

Me këtë pasaportë u pajisën të gjithë futbollistët dhe stafi kuqezi. Por, këto pasaporta si duket nuk vlejnë në gjithë Evropën, pasi Amir Abrashi ka zbuluar se detyrohet ta përdorë atë të Zvicrës për t’iu shmangur ndalesave.

“Më ndodh gjithmonë që duan të shohin një tjetër dokument, sa herë që paraqes pasaportën diplomatike të Shqipërisë”, ka thënë futbollisti shqiptar për mediat zvicerane.

Sipas tij, ka shumë punonjës në aeroporte që nuk e njohin atë, për të cilën kërkojnë dokumente shtesë për ta vërtetuar rregullsinë e saj. “Në çdo moment, u tregoj pasaportën zvicerane për të shmangur çdo pengesë”, ka deklaruar Abrashi.

Mesfushori i Freiburgut është një prej futbollistëve që kanë dyshtetësi, konkretisht atë helvete krahas pasaportës shqiptare.