“Mafia shqiptare mbretëron në tregtinë e të gjitha llojeve të drogës”

“Dilerët shqiptarë dhe kosovarë të drogës po e përshtatin ofertën e tyre me tregun, duke u orientuar nga shitja e heroinës edhe në atë të kokainës e kanabisit."

Policia zvicerane, duke u mbështetur në rastet e viteve të fundit të kapjes së drogës, ka ardhur në përfundimin se “dilerët shqiptarë dhe kosovarë të drogës po e përshtatin ofertën e tyre me tregun, duke u orientuar nga shitja e heroinës edhe në atë të kokainës e kanabisit.

“Tradicionalisht mafitë shqiptare dhe ato kosovare veprojnë në tregtinë e heroinës”. Kështu thotë Olivier Guéniat, shef i Policisë për Kriminalitet i kantonit të Neuchatelit, i cituar në një artikull të gazetës “Le Matin Dimanche”. Por prej pesë ose gjashtë vitesh këto organizata kriminale kanë nisur të “diversifikohen”. Kjo tregohet në vazhdimësi në rastet kur konfiskohet drogë në Zvicër, transmeton albinfo.ch.

Edhe për ekspertët e drogës kjo kthesë është krejtësisht e logjikshme, transmeton albinfo.ch. “Kualiteti i heroinës gjatë njëzet viteve të fundit ka pësuar rënie”, thotë Gueinat. Dhe kjo vjen si shkak i faktit se ka më pak heroinë në dispozicion.

Edhe pse tregtarët shqiptarë dhe kosovarë të drogës kanë hyrë në tregun e kokainës dhe të kanabisit, kjo sipas Gueinat nuk nënkupton ashpërsimin e konkurrencës për tregtarët me drogë nga Amerika Latine ose Afrika Perëndimore, të cilët tradicionalisht tregtojnë kokainë.

Kriminelët e organizuar nga Shqipëria dhe Kosova kanë vepruar në mënyrë diskrete, njësoj sikur amerikanët, përcjell albinfo.ch. Kështu, ata zakonisht kanë siguruar banesa nga të cilat kanë vepruar, për ndryshim nga tregtarët afrikanë të cilët janë më të pranishëm në rrugë duke shitur.