Kosova me dy medalje të arta në “Grand Prix”

Nora Gjakova dhe Distria Krasniqi, dy xhudistet kosovare, kanë fituar medaljet e arta në turneun e xhudos “Grand-Prix - Antalya 2017” që po mbahet në Turqi

Dy xhudistet e njohura kosovare, Nora Gjakova dhe Distria Krasniqi kanë fituar medaljet e arta në turneun e xhudos “Grand-Prix – Antalya 2017” që po mbahet në Turqi. Me dy medaljet e arta, Kosova po dëshmohet edhe një herë se ka nxjerr një gjeneratë të shkëlqyer të xhudesteve që po lënë gjurmë nëpër turnetë dhe kampionatet botërore.

Nora Gjakova e kaloi rrethin e parë pa luftë, kurse në atë të dytë ishte më e mirë se xhudistja nga Kirgistani, Kseniia Beldiagina. Në gjysmëfinale, Nora e ka mundur kongolezen Khulan Tseregbaatar, derisa në finale shkëlqeu ndaj izraelites Timma Nelson Levy.

Ndërsa Distria Krasniqi, rundin e parë e ka kaluar pa luftë, kurse në xhiron e dytë e ka eliminuar izraeliten Ariel Bezalel. Po ashtu në finale Distria e mposhti izraeliten, Gili Cohen, në kategorinë deri në 52 kilogramë, me dy waza-ari.

Pas Majlinda Kelmendit, e cila është kampione botërore dhe olimpike, tani karvanit të të artave iu kanë shtuar edhe Nora dhe Distria.

Trajneri i xhudos, Driton Kuka është shprehur mjaft i lumtur me suksesin e garueseve të tij, të cilat fituan medalje të arta në “Grand Prix Antalya 2017”, duke treguar se diçka të tillë xhudistet kosovare nuk kishin arritur më parë. “Kjo është hera e parë që Kosova fiton dy të arta në nivelin “Grand Prix” të Kupave Botërore. Shqiptarët kudo që janë i panë live heronjtë tanë modernë”, ka thënë Kuka.

Fitoreve të dy xhudisteve pejane i ështç gëzuar edhe zëvendëskryeministri i Kosovës, Ramiz Kelmendi. Ai  ka shkruar në Facebook se sporti i xhudos “na bënë krenarë”.

“Edhe njëherë si shumë herë të tjera në të kaluarën sporti i xhudos na bënë krenarë. Kësaj radhe urimet më të përzemërta për dy ambasadoret tona të arta, Distria Krasniqi dhe Nora Gjakova. Prezantim dinjitoz i shtetit të Kosovës, i kurorëzuar me të arta edhe në nivelin “Grand Prix” të Kupave Botërore. Urime dhe respekt i veçantë në këtë arritje, edhe për trajnerin dhe selektorin Driton Kuka”, shkruan Kelmendi.