Komunat e Gjenevës të gatshme të ndihmojnë Vitinë

Gjatë vizitës në Gjenevë, Sokol Haliti ka vizituar edhe kompaninë për prodhimin dhe meremetimin e vinçave “VILVER”, që udhëhiqet nga një mërgimtar vitias, Halil Rrahmani nga Sllatinë e epërme

Komunat e ndryshme të Gjenevës janë shprehur të gatshme të ndihmojnë Komunën e Vitisë. Kjo është bërë e ditur, pasi kryetari i Vitisë, Sokol Haliti ka pasur vizitë në Gjenevë, ku ka realizuar shumë takime, njofton faqja e komunës së Vitisë.

Haliti është takuar me drejtuesit e komunave të Vernierit, Plan-les –Ouates, si dhe me drejtuesit e kompanive të ndryshme të mërgimtarëve që veprojnë në Gjenevë të Zvicrës, përcjell albinfo.ch.

Kryetari i Komunës së Vernierit, Apostoloz, ka thënë se është i gatshëm për bashkëpunim dhe do të bashkëpunojnë në fushat e interesit të përbashkët. Ai ka premtuar se do të vizitojnë Vitinë.

Për rritjen e bashkëpunimit mes komunës së Verierit dhe Vitisë, është angazhuar edhe këshilltari vitias i asamblesë komunale të Vernierit, Leutrim Hebibi, i cili ka theksuar se me gjithë potencialin që ka, do të angazhohet që dy komunat të kenë një lidhje më të ngushtë mes tyre.

Gjatë vizitës në Gjenevë, Haliti ka vizituar edhe kompaninë për prodhimin dhe meremetimin e vinçave “VILVER”, që udhëhiqet nga një mërgimtar vitias, Halil Rrahmani nga Sllatinë e epërme.

Rrahmani është shprehur se prodhimet që dalin nga kjo fabrikë janë të dedikuar për tregun e shtetit zviceran, ushtrinë, por edhe për biznese tjera. Edhe ai është shprehur i gatshëm të investojë në Kosovë.