Në çdo kantier ndërtimi ka punëtorë në të zezë

Numri i padive ndaj punëtorëve në të zezë është rritur viteve të fundit në Zvicër. Për ndërmarrësit seriozë, biznesi i paligjshëm është një problem i madh.

Molerët, muratorët apo elektricistët janë disa nga profesionet, të cilët janë duke luftuar me punëtorët në të zezë. “Ata janë si rëra në det. Në çdo kantier ndërtimi ka punëtorë në të zezë. Kjo është shumë problematike për firmat e mëdha”, thotë një moler, i cili dëshiron të mbetet anonim. Në fakt, sipas ekspertëve në sektorin e ndërtimit, problemi i punës në të zezë është i njohur në gjithë Zvicrën.

Nga Shoqata zvicerane për molerë dhe gipserë (SMGV) shprehen se “tema e punëtorëve në të zezë është një problematikë që aktualizohet shpesh”, thotë për 20 min drejtori Peter Bäriswyl.
Numri i saktë i tyre mbetet enigmë. “Problemi është kryesisht për shkak se punëtorët në të zezë paguhen lirë dhe kështu janë konkurrencë e madhe për ndërmarrësit seriozë.
Problemi është i njohur edhe në Policinë Kantonale në Cyrih: “Ne kemi një mandat ligjor dhe, për këtë arsye rregullisht kryejmë inspektime në përputhje me ligjin në fuqi”, thotë Marc Besson. Këto zhvillohen në institucione të ndryshme me rroba civile apo edhe në uniformë.

Në vitin 2016 janë raportuar rreth 1000 punëtorë në të zezë dhe rreth 500 punëdhënës që kanë ofruar punë ilegale. Në vitin 2015 janë raportuar rreth 900 punonjës dhe rreth 400 punëdhënës, e në vitin 2014 rreth 600 të punësuar dhe mbi 300 punëdhënës.