Emigrantët u dërgojnë 430 miliardë dollarë familjeve të tyre: Rënie prej 2.4%

gjatë vitit 2016 emigrantët e punës në gjithë botën kanë dërguar 2.4 për qind më pak të holla (11 miliardë më pak) në familjet e tyre krahasuar me një vit më parë.

Në vendet e varfra dhe ato në zhvillim, shumica e popullatës ia del të mbijetojë, kryesisht falë dërgesave të rregullta (remitancave) nga familjarët në emigracion.

Sipas Bankës Botërore, ky burim jetësor për shumë familje të varfra ka dy vite rresht që po shënon ulje. Kështu, gjatë vitit 2016 emigrantët e punës në gjithë botën kanë dërguar 2.4 për qind më pak të holla në familjet e tyre krahasuar me një vit më parë. Që shprehur me shifra është 11 miliardë më pak në krahasim me vitin paraprak. Ndryshe, shuma e përgjithshme e dërgesave nga emigracioni gjatë vitit 2016 ka qenë rreth 430 miliardë dollarë.

Rënie mbimesatare të dërgesave janë regjistruar sidomos në vendet e Azisë Jugore si: India, Bangladeshi dhe Nepali. Por, të goditura nga ky reduktim kanë qenë edhe vendet e Afrikës.

Është për tu vënë re se pikërisht dërgimi i parave në vendet më të varfra të Afrikës kushton më së shtrenjti. Firmat që ndërmjetësojnë dërgimin e parave si Western Union, PayPal ose Moneygramm marrin afër 10 për qind të shumës në emër të taksës së dërgimit.

Reduktimi i remitancave do ta bëjë dukshëm më të vështirë qasjen në shërbimet shëndetësore,, ushqim e shkollim për familjet e prekura, thekson Banka Botërore.