Gjermania bën ndalimin e pjesshëm të burkas

Sipas dispozitave të ligjit, gratë myslimane nuk mund të veshin burka në vendin e punës, nëse ata janë të punësuara në sektorin publik, gjyqësor dhe në ushtrinë gjermane

Ligjvënësit në dhomën e ulët të Parlamentit gjerman miratuan një ligj për ndalimin e pjesshëm të burkave.

Bëhet fjalë për veshjen e grave myslimane, e cila mbulon jo vetëm trupin, por  tërësisht fytyrën.

Që ligji të hyjë në fuqi, tani është e nevojshme që ai të kalojë në dhomën e lartë të parlamentit.

Sipas dispozitave të ligjit, gratë myslimane nuk mund të veshin burka në vendin e punës, nëse ata janë të punësuara në sektorin publik, gjyqësor dhe në ushtrinë gjermane.

Partitë gjermane të djathta kërkuan nga Qeveria e kancelares Angela Merkel, një ndalim total të burkas në publik. Franca është i vetmi vend evropian, ku burka ka qenë e ndaluar që nga viti 2011.

Më shumë se një milion emigrantë erdhën në Gjermani në 18 muajt e fundit, shumica e tyre nga Lindja e Mesme.

Një numër i vogël i grave myslimane gjermane veshin burka.

Ndalimi burkas është marrë si nevojë për integrimin e emigrantëve në standardet e shoqërisë gjermane, por edhe për arsye sigurie ngase fsheh tërësisht identitetin.

Gjermania u ekspozua ndaj disa sulmeve xhihadiste terroriste, prej të cilëve më i rëndi ishte ai në Berlin, në tregun e Krishtlindjeve, kur xhihadisti me një kamion të vjedhur hyri me makinë në mes të vizitorëve, duke vrarë 12 persona.