Qeveria e Kosovës miratoi projektbuxhetin për vitin 2012

Kosova për vitin 2012, pritet t’i ketë rreth 1 miliardë e 520 milionë euro

Kjo shumë parashihet në Projektligjin për Buxhetin e Republikës i cili është miratuar nga Qeveria e Kosovës.

Para miratimit, kryeministri Hashim Thaçi ka deklaruar para anëtarëve të kabinetit qeveritar se përderisa në ekonomitë e vendeve botërore ka rënie e ngecje, Kosova po shënon ngritje. “Kjo është dëshmi që Qeveria po punon për qytetarët. Kosova duhet të krenohet, pasi shumë shtete të botës kanë kriza financiare, ndërsa Kosova ka shënuar ngritje të buxhetit”, ka thënë kryeministri Thaçi.

Ndërkaq, ministri i Financave, Bedri Hamza, ka thënë se buxheti për vitin e ardhshëm ka dy prioritete kryesore: përmirësimin e mirëqenies së qytetarëve dhe zhvillimin ekonomik të vendit. Ai ka shtuar të kenë dalë të pavërteta kritikuat e akuzat ndaj Qeverisë se Kosova po bankroton. “Projektbuxheti është në pajtim me marrëveshjen me Fondin Monetar Ndërkombëtar”, ka theksuar ministri Hamza.