Parlamenti Evropian kërkon qeveri proevropiane në Kosovë

Parlamenti Evropian e ka miratuar me shumicë të madhe Raportin e raportuese së posaçme për Kosovën, Ulrike Lunacek, e cila pas vendimit tha se "në këtë mënyrë mbahet e hapur edhe perspektiva evropiane" e këtij vendi

Tri dit pas zgjedhjeve, Parlamenti Evropian e ka miratuar me shumicë votash raportin për Kosovën, me të cilin i bën thirrje Prishtinës që të formojë sa më shpejt qeverinë e re me koncept pro evropian. Raporti i PE-së ishte hartuar nga raportuesja e posaçme për Kosovën, Ulrike Lunaçek, e cila kërkon gjithashtu që të mbahet hapur perspektiva evropiane e Kosovës.

“Në rrugën e saj drejt vendosjes së shtetit juridik, zhvillimit demokratik dhe ekonomik, Kosova ka nevojë për një perspektivë të qartë evropiane. Bllokada politike e muajve të fundit duhet të përfundojë menjëherë”, thotë Lunaçek, e cila kërkon krijimin e shpejtë të një qeverie proevropiane dhe kthimin tek një politikë konstruktive që synon zgjidhjen e problemeve të qytetarëve të Kosovës.

Parlamenti Evropian e ka miratuar raportin me një shumicë të madhe: 474 për, 134 kundër dhe 64 abstenime.

Lunaçek pas këtij vendimi kumtoi se “qeveria dhe Parlamenti i ri në Kosovë duhet të plotësojnë edhe dy kërkesat e fundit për liberalizimin e vizave”.

“Qytetarët e Kosovës janë të vetmit në Ballkanin Perëndimor, të cilit nuk gëzojnë të drejtën e lëvizjes së lirë pa viza. “Kjo krijon përshtypjen e një izolimi dhe trajtimi si qytetarë të rendit të dytë”, kumtoi Lunaçek, citon DW.

Ajo theksoi se Kosova sa më parë duhet të ratifikojë në Parlament marrëveshjen për demarkacionin e kufirit me Malin e Zi. Dhe e dyta, gjykatat duhet të dënojnë plotfuqishëm personat e nivelit të lartë politikë, të akuzuar për korrupsion dhe krim të organizuar. Gjithashtu duhet të forcohet edhe lufta kundër rrjeteve kriminale në vend.

“Raporti im kërkon përmirësimin e gjendjes në fushën e shtetit juridik dhe respektimit të të drejtave të mediave. Sulmet ndaj gazetarëve duhet të përfundojnë, ndërsa përgjegjësit duhet të nxirren para drejtësisë.”

Në Raport kërkohet edhe vazhdimi i dialogut mes Prishtinës dhe Beogradit, në frymën e fqinjësisë së mirë dhe zbatimit të marrëveshjeve të arritura. Në këtë dokument kërkohet edhe nga pesë vendet tjera të BE që më në fund ta njohin shtetin e Kosovës. Mosnjohja e Kosovës pengon bashkëpunimin efikas ndërkombëtar, që nënkupton edhe bashkëpunimin në kuadër të Europolit dhe Interpolit.