Njoftim nga MPB-ja e Republikës së Maqedonisë

Ambasada e Republikës së Maqedonisë në Bernë

Ambasada e Republikës së Maqedonisë – Bern

Амбасада на Република Македонија – Б Е Р Н

Botschaft der Republik Makedonien – Bern

Nr. 04-03-1000/2

Data: 30.11.2011

Drejtuar:

Qendrave kulturore, arsimore shqiptare të shtetasve të

Republikës së Maqedonisë në Konfederatën Zvicerane

I nderuari Kryetar,

E nderuara Kryesi, të respektuar bashkëqytetarë,

Ministria e Punëve të Brendshme e Republikës së Maqedonisë, njofton:

– Pasaportat jo-biometrike, të lëshuara para datës së hyrjes në fuqi të Ligjit për dokumentet e udhëtimit për shtetasit e Republikës së Maqedonisë (“Gazeta zyrtare e Republikës së Maqedonisë” nr.19/2007), do të jenë të vlefshme deri më 27.02.2012.

– Sipas ligjit për ndryshimin e Ligjit për letërnjoftim (“Gazeta zyrtare e Republikës së Maqedonisë” nr.19/2007 dhe 10/2010), letërnjoftimet e lëshuara para datës së hyrjes në fuqi të këtij ligji, do të jenë të vlefshme deri më 27.02.2012.

– Sipas Ligjit për sigurinë e komunikacionit rrugor (“Gazeta zyrtare e Republikës së Maqedonisë” nr.54/2007), lejet e drejtimit, të lëshuara para datës së hyrjes në fuqi të këtij ligji, do të jenë të vlefshme deri më 01.10.2012.

Në bazë të informacioneve të lartëpërmendura, qytetarët e Republikës së Maqedonisë janë të detyruar t’i zëvendësojnë dokumentet e vjetra personale jo-biometrike, me dokumente të reja biometrike, deri në afatet e theksuara më lartë.

Shtetasit e Maqedonisë me qëndrim në Zvicër, të cilët do të udhëtojnë në Republikën e Maqedonisë pas 27.02.2012 dhe të cilët posedojnë pasaporta të vjetra jo-biometrike, duhet të vijnë në Ambasadë, me pasaportën e vjetër, 2 fotografi (jo më të vjetra se 6 muaj) dhe 37 Chfr, që të furnizohen me fletëudhëtime.

Ambasada e Republikës së Maqedonisë në Bernë

---