Clinton e takon Jahjagën dhe e siguron për sovranitetin e Kosovës

Sekretarja amerikane e Shtetit, Hillary Clinton, ka takuar në Washington presidenten e Republikës së Kosovës, Atifete Jahjaga, dhe bashkë me të ka nënshkruar edhe një marrëveshje për Mbrojtjen dhe Ruajtjen e Trashëgimisë Kulturore.

Pasi foli për rëndësinë e marrëveshjes, Hillary Clinton, ka përsërit mbështetjen e fuqishme për sovranitetin dhe tërësinë territoriale të Kosovës.

“Presidenti Barack Obama dhe unë, jemi të përkushtuar për të garantuar se e ardhmja që Kosova po përpiqet të ndërtojë do të ketë rëndësi të madhe në radhë të parë për popullin e Kosovës, por dhe për të gjithë rajonin”, ka Clinton.

Ajo ka deklaruar se shpreson që vendimi i javës së kaluar i Bashkimit Evropian të hapë rrugën për integrimin e Kosovës në BE, raporton Zëri i Amerikës.

Presidentja Jahjaga e quajti marrëveshjen e nënshkruar në Departamentin e Shtetit një akt të fuqishëm simbolik që flet për marrëdhëniet e forta mes Kosovës dhe Shteteve të Bashkuara.

Sipas Zërit të Amerikës, Jahjaga ka theksuar se Shtetet e Bashkuara i kanë qëndruar kurdoherë pranë Kosovës.

“Qëndrimi ynë, është ndërtimi i marrëdhënieve të mira me të gjithë fqinjët. Kosova, tha ajo, është vend i ri me një histori të gjatë dhe ka një trashëgimi të pasur kulturore”, ka deklaruar ajo.

Presidentja e Kosovës ndodhet në Washington për një numër aktivitetesh. Të enjten, Jahjaga do të marrë pjesë në përurimin e një nisme të re të Sekretares Clinton për të shtuar numrin e grave në shërbimin publik dhe në udhëheqjen politike të të gjitha niveleve.