Terroristët në Spanjë kishin plane për sulme më të mëdha

Policia akoma është duke kërkuar ngasësin e kombibusit që goditi dhjetëra persona në Las Ramblas të Barcelonës, e që la të vdekur 13 persona

Një celulë e 12 terroristëve që kreu dy sulmet terroriste në Spanjë këtë javë kishte mbledhur 120 bombola gazi dhe planifikonte t’i përdorte ato në sulmet me vetura.

Kështu ka konfirmuar policia që ka gjetur bombolat në një shtëpi, e cila dyshohet se është përdorur nga ky grup.

Një nga shpërthimet u bë në Alcantar të mërkurën në mbrëmje. Policia akoma është duke kërkuar ngasësin e kombibusit që goditi dhjetëra persona në Las Ramblas të Barcelonës, e që la të vdekur 13 persona.

Përpos 13 personave të vrarë të enjten në mbrëmje në Las Ramblas, një grua ka vdekur në një sulm tjetër me vetura të premten në Cambrils. Pesë të dyshuar janë qëlluar për vdekje nga policia në sulmin e dytë.

Policia katalonase ka thënë se grupi prej 12 burrave kishte planifikuar sulmet qe më shumë se gjashtë muaj.