Të gjithë kundër ligjit mbi shtetësinë, ndryshojnë vetëm motivet

SVP kërkon që ligji të ashpërsohet ndërsa partitë e majta e kundërshtojnë atë si më i ashpër në krahasim me ligjin e mëparshëm

Kriteret që duhet t`i plotësojnë të huajt për fitimin e shtetësisë në kantonin e Cyrihut janë kritikuar nga të dy polet e spektrit politik. SVP kërkon që ligji i ri për shtetësi të ashpërsohet dhe për këtë kërkon referendum popullor. Ndërsa partitë e majta kundërshtojnë ligjin në fjalë pikërisht për faktin se ashpërson kriteret, në krahasim me ligjin e vjetër.

Sipas SVP-së, të huajt që kërkojnë shtetësinë zvicerane duhet të nënshkruajnë një „deklaratë për lojalitetin”. Me këtë deklaratë ata do të zotoheshin se do të respektojnë rregullat dhe zakonet në Zvicër. Kjo parti kërkon gjithashtu që vetëm të huajt me biografi të pastër të mund të bëhen zviceranë. Për shkelje ligji në komuikacion, sipas saj, i huaji duhet të presë në listë edhe 15 vite të tjera!

Partitë e majta si SP, të gjelbrit dhe AL kërkojnë po ashtu referendum, por, ato për zbutje të ligjit. SP thotë se ligji i ri po e vë në lojë perceptimin e kantonit të Cyrihut, si vend i hapur ndaj botës.

Ligji i ri për fitimin e shtetësisë është më i ashpër se i mëparshmi. Veç tjerash, ai vë si kusht pasjen e lejes së qëndrimit të përhershëm (C), kusht që më parë nuk kërkohej.