Kreu i OKB-së, i shqetësuar thellë nga sulmet mbi myslimanët në Myanmar

Guterres ka nënvizuar me këtë rast përgjegjësinë që ka qeveria e vendit për t`u kujdesur për sigurinë në provincën Rakhine

Keystone

Sekretari i Përgjithshëm i OKB-së, Antonio Guterres ka tërhequr vërejtjen për një katastrofë humanitare në krahinën Rakhine të Myanmar-it (Ish Birmania), në Azinë Juglindore. Ai është shprehur i shqetësuar nga raportimet mbi sulmet e kryera ndaj pjesëtarëve të pakicës së atjeshme myslimane, shkruajnë mediat botërore.

Guterres ka nënvizuar me këtë rast përgjegjësinë që ka qeveria e vendit për t`u kujdesur për sigurinë në provincën e përmendur.

Programi Botëror i Ushqimit WFP, për shkak të dhunës që ka shpërthyer, ka ndërprerë dërgimin e ndihmave në Rakhine. Atje mbretëson pasiguri e madhe, thonë përgjegjësit e WFP.

Kjo organizatë, sipas asaj që bën të ditur vetë, po merret vesh me autoritetet e vendit në mënyrë që sa më shpejt që të jetë e mundur, të fillojë sërish me dërgimin e ndihmave.