Kundërshtohet iniciativa për pushime gjashtëjavëshe

Po kështu edhe Qeveria Federale ka rekomanduar parlamantin që të mos e miratojë iniciativën për pushime të zgjatura

Komisioni për ekonomi i Parlamentit Nacional është deklaruar kundër një iniciative për zgjatjen e pushimeve vjetore më shumë se katër javë.

Iniciatorët kishin kërkuar që të gjithë punëmarrësit të kenë të drejtë për të pasur së paku gjashtë javë pushim brenda vitit. Ndërkaq, komisioni për ekonomi, me shumicë votash (17 me 8) i ka rekomanduar parlamentit që ta refuzojë këtë iniciativë popullore.

Komisioni në fjalë rekomandon që personat mbi 50 vjeç të kenë së paku 5 javë pushim brenda vitit. Sipas këtij komisioni, rregullimi i çështjes së pushimeve më të gjata se këto, nuk duhet të jetë objekt i ligjit. Ato mund të negociohen ndërmjet partnerëve socialë (punëmarrësit dhe punëdhënësit). Po kështu edhe Qeveria Federale ka rekomanduar parlamantin që të mos e miratojë iniciativën për pushime të zgjatura.

Nga ana tjetër, sindikatat shprehen se janë shumë pak katër javë pushime vjetore. Sipas tyre stresi i të punësuarve sot është më i madh se më parë dhe kjo ka ndikim të drejtpërdrejtë në shëndetin e tyre.