E jep rrogën për bamirësi, thotë se deputetët s’punuan asgjë

Pagën prej rreth 1 mijë e 400 euro, deputeti Haxhi Avdyli e ka ndarë për bamirësi.

Më shumë se 178 mijë euro janë paguar 120 deputetët e Kuvendit të Kosovës në total për muajin gusht. Por ata pagat i kanë marrë pa kryer asnjë punë. Gjatë kësaj kohe ata të Vetëvendosjes, LDK-së, AKR-së e Alternativës janë mbledhur në 6 seanca e deputetët e PAN-it në 2.

Por pagën prej rreth 1 mijë e 400 euro, deputeti Haxhi Avdyli e ka ndarë për bamirësi. Ai ka thënë për KTV-në se kolegët e tij moralisht do të duhej të hiqnin dorë nga paga meqenëse nuk është bërë asnjë punë.

Sipas sekretarit të Kuvendit, Ismet Krasniqi, deputetët do të paguhen vetëm me një mëditje, sepse seanca llogaritet si një dhe çdo herë ka qenë vazhdim i seancës së parë.